|
Беларусы бываюць розныя. І лёсы ва ўсіх розныя. І шанцуе ўсім па-рознаму... Я ацэньваю са сваёй пазіцыі, можа ў чым-то і памыляюся. Як ставяцца да беларусаў у Расеі? Лічу, што добра. Часам вельмі добра. Да беларусаў, да Беларусі, да ўсяго беларускага. Велізарная колькасць людзей сімпатызуе прэзідэнту Беларусі А. Р. Лукашэнка, многія хацелі б бачыць яго прэзідэнтам Расіі. Сімпатыя і павага да прадукцыі беларускіх прадпрыемстваў. Я сам, напрыклад, стараюся купляць малочныя вырабы беларускай вытворчасці (а мая жонка, напрыклад, прызнае толькі згушчанае малако вытворчасці г. Рагачоў, а ўсё астатняе за згушчонку не лічыць) і справа не толькі ў нацыянальных пачуццях, а ў высокай якасці прадукцыі.
Аднак стала прасочвацца наступная тэндэнцыя. Калі раней казалі: "Мы брацкія народы, у нас брацкія дзяржавы...", то зараз усё часцей можна пачуць (як ад звычайных людзей, так і ад афіцыйных асобаў рознага ўзроўню): "Мы адна краіна, адзін народ, штучна падзелены. Ніякіх беларусаў на самай справе не існуе, ёсць адзіны рускі народ, у нас агульная культура і агульная мова." Часам можна пачуць развагі аб тым, хто вінаваты ў гэтым падзеле. Само сабой вінаватыя Захад, ЗША, сусветная змова, сусветны сіянізм, масоны і г. п. Ну і, вядома, вінаватыя беларускія нацыяналісты. Але ў будучыні, як мяркуюць некаторыя, усе адумаюцца, усё адновіцца, падзел на асобныя кватэры па нацыянальнай прыкмеце знікне і "усё зноў будзем разам". Пры гэтым відавочна мяркуецца, што кватэра Старэйшага брата будзе ў уласнасці Старэйшага брата, а кватэра Малодшага брата будзе таксама ва ўласнасці Старэйшага брата.
Таксама многія ў Расіі адмаўляюць існаванне самастойнай беларускай мовы, гэта, на думку гэтых людзей, усяго толькі дыялект рускай. А адзін мой знаёмы перакананы, што беларуская мова гэта нешта штучнае (накшталт эсперанта), створанае Тарашкевічам і іншымі беларускімі палітычнымі і культурнымі дзеячамі. Поўная лухта! А якая мова ў такім выпадку была дзяржаўнай мовай Вялікага Княства Літоўскага? Та жа, што ў Маскве? Гэтага не было, было дзве самастойных мовы.
Я прытрымліваюся крыху іншых поглядаў, чым тыя людзі, пра якіх напісаў. Свае погляды шырока не афішую, але выпадкова мае калегі ўбачылі ў маім мабільным тэлефоне запіс мелодыі гімна БНР "Мы выйдзем шчыльнымі радамі..." Ну што, некаторыя аўтарытэтныя людзі гутарылі са мной і тлумачылі мне, што я не маю рацыю. Пасля гэтага я стаў больш маўчаць, асабліва калі размова заходзіць на нацыянальныя тэмы (гэты партал не ў рахунак...) Супраць цячэння ісці цяжка, ды і працу губляць не хочацца...
Які вывад можна зрабіць з таго, што я напісаў? Беларусу ў Расеі жыць можна. І часам досыць нядрэнна. Але лепш не казаць гучна і часта пра тое, што ты беларус...
|
Адразу шмат пытанняў знімалася.
